សព្វថ្ងៃនេះ ក្រុមហ៊ុនកម្ពុជា តេលា មានស្ថានីយផ្ដល់សេវាកម្មចំនួន ១.៨៩៩ ស្ថានីយ ដែលមាន​ទីតាំង​ជាយុទ្ធសាស្រ្ត​នៅទូទាំងព្រះរាជាណាចក្រកម្ពុជា ដើម្បី​ឱ្យប្រជាជនកម្ពុជាម្នាក់ៗ មានភាពងាយស្រួល​ក្នុងការប្រើប្រាស់សេវាកម្ម និងផលិតផលប្រេងឥន្ធនៈ និងហ្គាសរបស់យើង។ ស្ថានីយផ្ដល់សេវាកម្ម តេលា ជាង ១.៨០០ ត្រូវបានគ្រប់គ្រង និងដំណើរការដោយអតិថិជនប្រចាំរបស់តេលា តាមរយៈការទិញអាជ្ញាប័ណ្ណពាណិជ្ជកម្ម។

ក្រុមហ៊ុនកម្ពុជា តេលា បច្ចុប្បន្នកំពុងដំណើរការហាងលក់ទំនិញ​នៅតាមស្ថានីយចំនួន ៥០ កន្លែង ដែល​ផ្តល់ជូននូវទំនិញប្រើប្រាស់ប្រចាំថ្ងៃ ជាច្រើនប្រភេទ ​ដល់អតិថិជន​ប្រចាំ របស់តេលា។ ចាប់ពីឆ្នាំ ២០១៩ តទៅយើងមានផែនការដាក់អាជីវកម្មបន្ថែម​ទៀតទៅដល់បណ្ដាញ​អាជីវកម្មរបស់យើង ដោយបន្ថែមសេវាកម្មកាហ្វេ (Lunar Coffee) ទៅកាន់ស្ថានីយផ្ដល់សេវា​កម្ម​របស់​យើង។

ដើម្បីឆ្លើយតបទៅនឹងតម្រូវការដែលកំពុងកើនឡើងនៅក្នុងព្រះរាជាណាចក្រកម្ពុជា ដែលកំពុងកើនឡើងយ៉ាងឆាប់រហ័ស យើងមានឡានដឹកទំនិញច្រើនជាង ៥០០ គ្រឿង សម្រាប់ធ្វើប្រតិបត្តិការប្រចាំថ្ងៃ ក្នុងការដឹកជញ្ជូន​ឱ្យបានទាន់ពេលវេលា​ដល់អតិថិជននៅគ្រប់តំបន់​នៃព្រះរាជាណាចក្រកម្ពុជា។ យើងកំពុងធ្វើឱ្យប្រសើរឡើងឥតឈប់ឈរ នូវដំណើរការអាជីវកម្ម និងប្រតិបត្តិការដឹកជញ្ជូន ស្របតាមស្តង់ដារជាសកល​សម្រាប់ការដឹកជញ្ជូន និងសេវាកម្ម ឱ្យស្របតាមស្តង់ដារ ISO 9001:2018។

ដោយបានធ្វើអាជីវកម្មហ្គាស LPG ចាប់តាំងពីខែកញ្ញា ឆ្នាំ ២០០៦ បច្ចុប្បន្ននេះ ក្រុមហ៊ុន កម្ពុជា តេលា មានធុងផ្ទុកហ្គាស LPG ដែល​មាន​រាង​ស្វែរ ចំនួន ២ ដែលមានសមត្ថភាពផ្ទុក ១.០០០ ម៉ែត្រគូប  និងមានផែនការពង្រីក​សមត្ថភាព​ផ្ទុករហូត​ដល់ ៥.០០០ ម៉ែត្រគូប។ ដើម្បីបំពេញតម្រូវការរបស់អតិថិជនឱ្យកាន់តែមានប្រសិទ្ធិភាព យើងក៏បានរៀបចំ​រោងចក្រសម្រាប់ច្រកហ្គាស LPG ចំនួន ២កន្លែងនៅចំណតកុងតឺន័រ ក្រុងព្រះសីហនុ និងនៅរាជធានីភ្នំពេញ។

រោងចក្រផលិតប្រេងរំអិល របស់តេលា គឺជារោងចក្រដំបូងគេនៅកម្ពុជា ​ដែលត្រូវបានបង្កើតឡើងក្នុងឆ្នាំ ១៩៩៩ និងបំពាក់ដោយបច្ចេកវិទ្យាស្តង់ដារសកល  និងមានអ្នកបច្ចេកទេស និងវិស្វករគីមី ដែលទទួលការបណ្តុះបណ្តាល​ជាន់ខ្ពស់​។ រោងចក្រនេះ មានសមត្ថភាពផលិតប្រចាំឆ្នាំ ចំនួន ១០.០០០ តោន នៃផលិតផលប្រេងរំអិល ដែលមានចំណាត់ថ្នាក់ផ្សេងៗគ្នា។

ដោយមានការទទួលស្គាល់ពី LLOYD International សម្រាប់ស្ដង់ដារ​ប្រេងឥន្ធនៈ​កម្រិតអន្តរជាតិ បច្ចុប្បន្ននេះ យើងមានស្ថានីយស្តុកប្រេង និងហ្គាស ធំៗចំនួនពីរ គឺនៅចំណតកុងតឺន័រក្រុងព្រះសីហនុ និងនៅរាជធានីភ្នំពេញ ខណៈស្ថានីយស្ដុកប្រេងមួយបន្ថែមទៀត នៅបាត់ដឹង តាមបណ្តោយ​ផ្លូវលេខ ៥ កំពុងសាងសង់ ដើម្បីឆ្លើយតបនឹង​តម្រូវការដែលកំពុងកើន​ឡើងនៅ​ប្រទេសកម្ពុជា។ យើង ក៏បានរក្សាទុក​ទីតាំង​ដើម្បីសាងសង់ស្ថានីយស្ដុកប្រេង ចំនួន​ពីរ​បន្ថែម​ទៀត នៅកំពង់ចាម និងនៅព្រំប្រទល់ខេត្តបាត់ដំបង និងខេត្តបន្ទាយមាន​ជ័យ។

​ផែបណ្ដែតរបស់តេលាប្រវែង ១.២៥០ ម៉ែត្រ ត្រូវបានបំពាក់ដោយ បណ្តាញបំពង់ ទីធ្លាប្រតិបត្តិការ និងបង្គោលថ្មជាច្រើន ដែលត្រូវបានរចនាឡើង​សម្រាប់នាវា​ដែលមានទម្ងន់​ចាប់ពី ៥០០ ទៅ ៦០.០០០ តោន​ដើម្បីចូលចតដោយសុវត្ថិភាព​ និងងាយស្រួល។