ការថែរក្សារថយន្តរបស់អ្នក គឺជាភាពចាំបាច់។ វាមានសារៈសំខាន់សម្រាប់ភាពជឿជាក់ សុវត្ថិភាព និងសម្រាប់ការពារតម្លៃរថយន្តរបស់អ្នក។ មានកិច្ចការមួយចំនួន ដែលអ្នកអាចធ្វើបានយ៉ាងងាយស្រួលដោយខ្លួនឯង និងការងារមួយចំនួនទៀតគួរតែទុកឱ្យជាងជំនាញធ្វើប្រសើរជាង។
អ្នកគួរតែដឹងអំពីបញ្ហាដែលអាចកើតឡើង និងអ្វីដែលអាចកើតឡើងចំពោះរថយន្តរបស់អ្នក ដូច្នេះអ្នកអាចធ្វើការជួសជុល និងផ្លាស់ប្ដូរបាន។ យើងបានបង្កើតបញ្ជីនៃចំណុចមួយចំនួន សម្រាប់ឱ្យអ្នកពិចារណាក្នុងការថែទាំរថយន្ដ ឱ្យបានត្រឹមត្រូវ។
ព័ត៌មានលម្អិតភាគច្រើន គឺអាស្រ័យលើម៉ូដែលរថយន្ត ដែលអ្នកកំពុងប្រើប្រាស់។ សៀវភៅណែនាំរថយន្តរបស់អ្នក បានកំណត់អំពីតម្រូវការជាក់លាក់ សម្រាប់រថយន្តផ្ទាល់ខ្លួនរបស់អ្នក ហើយគួរតែសិក្សាដោយយកចិត្តទុកដាក់ដើម្បីធានាថា អ្នកអាចថែរក្សារថយន្តរបស់អ្នកបានត្រឹមត្រូវ។ ប្រសិនបើអ្នកមិនមានសៀវភៅណែនាំទេ នោះជារឿយៗអ្នកអាចទាញយកសៀវភៅណែនាំពីគេហទំព័ររបស់រោងចក្រផលិតបាន។
១- ប្រើប្រាស់ប្រេងឥន្ធនៈដែលមានបរិមាណអុកតានត្រឹមត្រូវសម្រាប់ឡានរបស់អ្នក
កម្រិតអុកតាន គឺជាមូលដ្ឋានសម្រាប់ការវាយតម្លៃជាសកលសម្រាប់ម៉ូទ័រដើរដោយប្រេងឥន្ធនៈ។ វាមានសារៈសំខាន់ ក្នុងការស្វែងយល់អំពីកម្រិតអុកតាននៅក្នុងប្រេងឥន្ធនៈ ដែលត្រូវនឹងរថយន្ដរបស់អ្នក។ ការប្រើប្រាស់ឥន្ធនៈមិនត្រឹមត្រូវ អាចបង្កបញ្ហាធ្ងន់ធ្ងរដល់ម៉ាស៊ីនរថយន្ដរបស់អ្នក។ ប្រសិនបើអ្នកមានសៀវភៅណែនាំសម្រាប់រថយន្តរបស់អ្នក នោះព័ត៌មាននេះគួរតែត្រូវបានបញ្ចូល។ រថយន្តដែលមានសមត្ថភាពខ្ពស់ជាច្រើន ដែលត្រូវការប្រេងឥន្ធនៈដែលមានអត្រាអុកតានខ្ពស់ជាង នឹងបញ្ជាក់ពីបញ្ហានេះនៅលើគម្របប្រេងឥន្ធនៈ ឬផ្ទៃតាប្លូរបស់រថយន្ត។
២- ប៉ូលាឡានរបស់អ្នកយ៉ាងហោចណាស់ ២ ដងក្នុងមួយឆ្នាំ
ប្រការនេះ នឹងជួយឱ្យរថយន្តមើលទៅស្អាតល្អ ប៉ុន្តែមានចំណុចសំខាន់មួយផ្សេងទៀតចំពោះការប៉ូលានេះ គឺការប៉ូលាឡាននឹងការពារច្រែះ ដែលអាចនាំឱ្យមានការចំណាយច្រើនក្នុងការជួសជុល។ ដើម្បីប៉ូលាឡានរបស់អ្នក ដំបូងត្រូវលាងសម្អាតវាដោយប្រើសាប៊ូដែលសមរម្យ ត្រូវប្រាកដថាឡានស្ងួតទាំងស្រុង បន្ទាប់មកអ្នកអាចយកថ្នាំប៉ូលាទៅប៉ាតលើផ្ទៃដែលមានថ្នាំពណ៌ឡានដោយប្រើប្រាស់ប៉ុងជូត។ លាបថ្នាំប៉ូលាដោយធ្វើចលនាជារង្វង់ បន្ទាប់មករង់ចាំឱ្យវាស្ងួតទាំងស្រុង។ នៅពេលវាស្ងួតល្អហើយ អ្នកអាចប៉ូលា និងសម្អាតដោយប្រើក្រណាត់ទន់។
៣- ប្ដូរផ្លិតទឹករបស់អ្នក
ផ្លិតទឹក (ពេលខ្លះត្រូវបានគេស្គាល់ថាជា ឧបករណ៍ជូតទឹកនៅលើកញ្ចក់) គឺជាបន្ទះកៅស៊ូវែង ដែលជួយបោសទឹកភ្លៀង ធូលី ឬកំទេចកំទីផ្សេងៗ ចេញពីកញ្ចក់រថយន្ដរបស់អ្នក។ វាគឺជាមុខងារសុវត្ថិភាពដ៏សំខាន់មួយដែលត្រូវបានបំពាក់លើរថយន្តទាំងអស់។ នៅពេលដែលអ្នកកត់សម្គាល់ថា ផ្លិតទឹកចាប់ផ្ដើមបង្កើតស្នាម នៅលើកញ្ចក់រថយន្ដរបស់អ្នក ពេលនោះវាមានន័យថា ដល់ពេលដែលត្រូវផ្លាស់ប្ដូរវាហើយ។ ពេលខ្លះអ្នកអាចស្វែងរកព័ត៌មានស្តីពី វិធីសាស្រ្តនៃការប្ដូរផ្លិតទឹក នៅក្នុងសៀវភៅណែនាំអំពីរថយន្តរបស់អ្នក ឬទៅយានដ្ឋានដើម្បីឱ្យគេជួយផ្លាស់ប្ដូរឱ្យតែម្ដង។
៤- ពិនិត្យសម្ពាធកង់រថយន្តរបស់អ្នក
ការបើកបររថយន្ដដែលសំបកកង់មិនបានសប់ត្រឹមត្រូវ នឹងធ្វើឱ្យសំបកកង់របស់អ្នកសឹករេចរិល ហើយបង្កើនបរិមាណប្រេងឥន្ធនៈដែលអ្នកកំពុងប្រើ។ វាចាំបាច់ខ្លាំងណាស់ ដែលអ្នកត្រូវពិនិត្យមើលសំបកកង់របស់អ្នកជាប្រចាំ ដើម្បីប្រាកដថា កង់រថយន្ដរបស់អ្នកមានខ្យល់គ្រប់គ្រាន់។ អ្នកក៏ត្រូវធានាថា ក្រឡាកង់រថយន្ដរបស់អ្នកមិនសឹករេចរិលពេក។ការបើកបរដោយប្រើសំបកកង់ដែលសឹករេចរិលគឺគ្រោះថ្នាក់ខ្លាំងណាស់។
៥- ប្តូរប្រេងម៉ាស៊ីនរបស់អ្នក
ការប្តូរប្រេងម៉ាស៊ីននៅក្នុងរថយន្ដរបស់អ្នក គឺជារឿងសំខាន់បំផុតមួយ ដែលត្រូវចងចាំពេលមើលថែទាំរថយន្ដរបស់អ្នក។ ប្រសិនបើអ្នកភ្លេច នោះប្រេងម៉ាស៊ីននឹងខូច ហើយធ្វើឱ្យខូចតម្រងប្រេង។ វាមានសារៈសំខាន់ខ្លាំងណាស់ដែលអ្នកត្រូវប្រើប្រាស់ប្រភេទប្រេងម៉ាស៊ីន ដែលត្រឹមត្រូវសម្រាប់រថយន្ដរបស់អ្នក។ ព័ត៌មានអំពីបញ្ហានេះ នឹងមាននៅក្នុងសៀវភៅណែនាំរថយន្ត។ ស្ថានីយតេលា ជាច្រើននៅទូទាំងប្រទេសកម្ពុជា អាចផ្តល់ជូននូវសេវាកម្មផ្លាស់ប្តូរប្រេងម៉ាស៊ីនយ៉ាងពេញលេញ។ តើអ្នកត្រូវផ្លាស់ប្តូរប្រេងម៉ាស៊ីនញឹកញាប់ប៉ុណ្ណាគឺអាស្រ័យលើម៉ូដែលរថយន្តដែលអ្នកប្រើ និងចម្ងាយដែលអ្នកបើកបររថយន្ត។ សៀវភៅណែនាំរថយន្តរបស់អ្នក គួរតែប្រាប់អ្នកថាតើអ្នកត្រូវបានណែនាំឱ្យធ្វើការផ្លាស់ប្ដូរប្រេងម៉ាស៊ីនញឹកញាប់ប៉ុណ្ណា សម្រាប់ម៉ូដែលរថយន្ដរបស់អ្នក។
៦- ពិនិត្យអំពូល
ជារឿយៗ អ្នកអាចដឹងថាមានបញ្ហាជាមួយនឹងអំពូលភ្លើងរបស់អ្នក នៅពេលអ្នកកំពុងបើកបរ ប៉ុន្តែដើម្បីធ្វើការត្រួតពិនិត្យពេញលេញអ្នកអាចស្នើមិត្តភក្តិ ឬសមាជិកគ្រួសារអ្នកឱ្យឈរនៅពីមុខឡានរបស់អ្នក។ បន្ទាប់មកពិនិត្យមើលអំពូលនីមួយៗ។ សូមពិនិត្យមើលពីស៊ីញ៉ូខាងឆ្វេង បន្ទាប់មកខាងស្តាំ ចង្កៀងខាងមុខទាំងភ្លើងហ្វា និង ភ្លើងកូត។ បន្ទាប់មក អ្នកអាចពិនិត្យបែបនេះម្តងទៀត សម្រាប់ផ្នែកខាងក្រោយនៃរថយន្ដរបស់អ្នក។ ប្រសិនបើទាំងអំពូលភ្លើងហ្វា និងភ្លើងកូត មិនមានដំណើរការ ជាក់លាក់ទេ នោះវាអាចមានបញ្ហាអគ្គិសនី ដែលត្រូវការជួសជុល។
៧- ពិនិត្យខ្សែពានរបស់អ្នក
ខ្សែពាន គឺជាផ្នែកមួយនៃម៉ាស៊ីនដែលផ្តល់ថាមពលដល់មុខងារផ្សេងៗ នៅក្នុងរថយន្ដទំនើបរួមមាន៖ ឌីណាម៉ូ ម៉ូទ័របូមចង្កូត ម៉ាស៊ីនត្រជាក់ និងម៉ូទ័របូមទឹក។ វាចាំបាច់ក្នុងការពិនិត្យមើលខ្សែពានរថយន្តរបស់អ្នក ដើម្បីឱ្យដឹងអំពីការខូចខាត ឬស្នាមប្រេះ។ ភាពតឹងនៃខ្សែពាន នឹងត្រូវការពិនិត្យ ដើម្បីឱ្យប្រាកដថាវាមិនយឺតពេក។ ប្រសិនបើចាំបាច់ អ្នកនឹងត្រូវផ្លាស់ប្ដូរខ្សែពានចេញ។ រថយន្តជាច្រើនមានអំពូលផ្ដល់សញ្ញាគ្រោះថ្នាក់ ដែលនឹងភ្លឺដើម្បីបង្ហាញ ប្រសិនបើមានបញ្ហាជាមួយខ្សែពាន ហើយសញ្ញានេះក៏អាចមានន័យថា មានបញ្ហាជាមួយនឹងអាគុយ ឬឌីណាម៉ូ របស់រថយន្តផងដែរ។ វាមិនមែនជាគំនិតល្អនោះទេ ក្នុងការបន្តបើករថយន្ត របស់អ្នកនៅពេលដែលខ្សែពាន សឹក យឺត ឬខូច។
៨- ពិនិត្យមើលហ្វុយស៊ីបរបស់អ្នក
នៅពេលភ្លើងខាងក្នុងនៅក្នុងរថយន្ដរបស់អ្នកឈប់ដំណើរការ វាអាចមានន័យថា ហ្វុយស៊ីបបានឆេះខ្លោច។ ហ្វុយស៊ីបនៅក្នុងរថយន្ដ គឺត្រូវបានដាក់ដើម្បីការពារពីការកើនឡើង នៃចរន្តអគ្គិសនី ប្រសិនបើចរន្ដអគ្គិសនីកើនឡើង នោះហ្វុយស៊ីបនឹងឆេះ កាត់ផ្តាច់ចរន្តអគ្គិសនី និងការពារគ្រឿងផ្សេងៗរបស់រថយន្ត។ ក្នុងស្ថានភាពបែបនេះ គ្រឿងនានា អាចឡើងកម្តៅខ្លាំង ដែលនឹងបង្កបញ្ហាធ្ងនធ្ងរ។ អ្នកអាចពិនិត្យមើលហ្វុយស៊ីបដោយខ្លួនឯងបានយ៉ាងងាយស្រួល។ ដំបូង អ្នកត្រូវរកមើលប្រអប់ហ្វុយស៊ីបរថយន្ត ដូចធម្មតា មិនមានទីតាំងស្តង់ដារជាសកលទេ ហើយទីតាំងរបស់វាប្រែប្រួលពីរថយន្ដមួយទៅរថយន្ដមួយ សៀវភៅណែនាំរបស់អ្នកអាចបញ្ជាក់ច្បាស់។ នៅក្នុងរថយន្ដជាច្រើន អ្នកអាចរកឃើញប្រអប់ហ្វុយស៊ីបនៅម្ដុំជុំវិញម៉ាស៊ីន ឬអាគុយ ប៉ុន្តែពេលខ្លះវាមានទីតាំងនៅខាងក្នុងរថយន្តក្រោមចង្កូត។ ពួកវាជាធម្មតាស្ថិតនៅក្នុងប្រអប់ខ្មៅ ដែលត្រូវបានសម្គាល់ថា “ហ្វុយស៊ីប” រថយន្តជាច្រើនមានប្រអប់ហ្វុយស៊ីបចំនួន ២។ នៅពេលដែលរកឃើញហើយ អ្នកអាចបើកប្រអប់ហ្វុយស៊ីប និងពិនិត្យមើលដ្យាក្រាម នៅផ្នែកខាងក្នុងនៃគំរប (ឬនៅក្នុងសៀវភៅណែនាំរថយន្តប្រសិនបើងាយស្រួលជាង)។ វាជាការសំខាន់ណាស់ដែលអ្នកមិនត្រូវដកហ្វុយស៊ីបចេញទេ ខណៈពេលដែលរថយន្តកំពុងបើក/បញ្ឆេះ បើអ្នកធ្វើបែបនេះអ្នកអាចនឹងឆក់។ សូមពិនិត្យមើលហ្វុយស៊ីបដោយមិនដកវាចេញ ដើម្បីពិនិត្យមើលសញ្ញានៃការខូចខាត។ អ្នកអាចបញ្ចាំងភ្លើង ដើម្បីពិនិត្យមើលហ្វុយស៊ីប ប្រសិនបើផ្នែកខាងក្នុងហ្វុយស៊ីបមានពណ៌ខ្មៅ វាបង្ហាញថាហ្វុយស៊ីបត្រូវបានឆេះហើយ។ អ្នកនឹងត្រូវការហ្វុយស៊ីបដូចគ្នាបេះបិតដើម្បីផ្លាស់ប្ដូរ ដូចជា៖ មានពណ៌ដូចគ្នា កម្រិតអំពែ និងរូបរាងដូចគ្នា។
